الغنوه دى ماكانتش عجبانى
فيها الالم والسهد والحزن وحدانى
زى الندا فى السوق على الفاكهه
اللى ابتدا فيها العطن يدب ويعانى
من الايدين اللى تقلب
وم العيون اللى تحلب
من الضروع الباقى والفانى
كانها موجوعه وهيا وجعانى
وكانها رسمى وخطى وعنوانى
تمللى سابقانى
ارجع لها
وامد ايدى
ادوقها بلسانى
بمرها الدايب فى احلامى
امسح واعيد تانى
نفس الحروف والامانى
الغنوه دى ماكانتش عجبانى
